वैशाखीसांज.....

या सांजेच्या काळजाला
का वाचा फुटत नाही
वा-याच्या कवेतून अलवार
का झुळूक सुटत नाही

हे वैशाखाचे बन विखुरले
गुलमोहर अलगद झडले
एकल साळुंक्याला अनाहूत
स्वप्न सहवासी पडले

हा काळीजवारा स्तब्ध
अवकाश रंगात भिजलेला
बागडणा-या थव्यांचा
मनात देह रूजलेला

हे सावल्यांचे फसवे स्पर्श
पावलात तापली माती
वैशाखाच्या घटिका मुक
आषाढी अभंग गाती

आकाश धवल निळे आणी
पिवळ्या साजात सजलेले
ओठांच्या शुष्कतेस भेदत
ये गीत दवात भिजलेले

गायी गेल्या गोठ्यात
रान मोकळे सारे
माळरानावर उरती दोघे...
माळ आणी...प्रतिक्षारत वारे

या वैशाखीसांजेस
शब्द फुटत नाही
गुलमोहराला फुलण्याचा
मोह सुटत नाही
(प्रताप)
28/5/2020
"रचनापर्व"
फोटो#नेटवरून साभार#