स्वप्नांशी नित्य....

स्वप्नांशी नित्य...

माझ्या भासात ,माझ्या संभ्रमात
आठवणींचा साचे पाणवठा
तुझ्या गही-या डोळ्यात उमटे
माझ्या थकल्या हाकेचा शिणवटा

मी पेरले गाईचे हंबरडे
मी धुन हवेची चितारली
गोकुळातील बासरीधुन
कवितेत माझ्या उतरली

मी सांज धुक्याचे मृगजळ
आकाशावर सांडताना
हाताशी धरले इंद्रधनू मी
तमोरंग मांडताना

मी चेतवल्या चांदण्या
चंद्रमाळ ती पेटली
झिळमिळती रेशीमगाठ
अलवार अलगद सुटली

फुलांचे गंध झिरपती
हा बहरही शित झरतो
मावळे चंद्रकोर नभी
मनात चांदवा उरतो

गारवा शिलगतो अलगद
हवा जणू स्तब्ध होते
मनीचे गीत माझे तुझ्या
असण्यावर लुब्ध होते.

मी रातमग्न पहाटे
उघडावी चांदण्याची पेटी
रातीच्या कुशित व्हाव्यात
तुझ्या स्वप्नांशी नित्य भेटी
(प्रताप)
"रचनापर्व "
दिनांक 30/11/2019
prataprachana.blogspot.com