स्वप्नावर सांडे चंद्र
चांदण्यास आला पुर
घर कुणाचे दुर?
झोंबे काकुळतीचा सुर
रातीवर येऊन सावली
अंधार दसदिशा वाही
मोडून पडता ग्वाही
वाट कुणाची पाही?
नजरेवर दाटे आस
चंद्र उदासे झरतो
वारा उधाण फिरतो
बहर असा का झुरतो?
माळरानावर माती
वा-यावर अलगद उडते
दाराला हाक अडते
रातीला स्वप्न पडते
चंद्र निघाला सजने
चांदण्या पडती मागे
रात अशी का वागे?
उसवत निद्रा धागे
घर धुक्यात हरवे
गुंतुन जाती वाटा
पायरव हा खोटा
स्वप्नांच्या अनंत लाटा
चांदण्याचा घेवून रंग
ढग निघाले गावा
गोकुळ करते धावा
मुक जाहला पावा
आस मनास लागे
रात अशी ही वैरी...
कालिया डोहात जहरी
यमुनेत कृष्ण लहरी
भास असा सुरीला
राधा घेई धाव
मनात कृष्णभाव
लागे त्याचा न ठाव.....
(Pr@t@p)
"रचनापर्व "
www.prataprachana.blogspot.com
(१६ ऑक्टोबर २०२१)
.jpg)
No comments:
Post a Comment