खुशाली....

झाडालाही असते गणगोत
ते नसते अनाथ, अनौरस...
दुर जंगलात त्याचे कुळ
फुलत असते
ऊन,वारा,पाऊस झेलत..
••••
अतिव इच्छा असुनही
त्याला भेटता येत नाही त्यांना
कडकडून...
उडत येणारी पाखरे,हवा
जमिनीवरून वाहत येणा-या
पाण्यातुन होते खुशालीची
ओसाड देवाणघेवाण
हर हंगामात..
••••
अवचीत एके दिवशी
कु-हाड उगारली जाते
लाकुडतोड्याच्या हातातील
कु-हाडीस भाऊबंदाच्या
फांदीचा दांडा पाहून
झाड कडकडून भेटते
कु-हाडीस...
•••••
पुढच्या हंगामात खुशाली
येते...
पण झाड असत नाही...
●●●
(Pr@t@p)
"रचनापर्व "
www.prataprachana.blogspot.com
2/4/2021