हुरहूरणारे.......

देशांतर या नभांचे

शिखराला हळू भिडते

मृदेच्या हृदयकणात ओले 

स्वप्न बघ धडधडते 

हा झ-याचा शुष्क वळ

कडेकपारी का खुलतो?

दगडांच्या राकट डोळ्यातून 

बघ पाऊस का गलबलतो?

ती डोंगरवाट का रेखते

आभासी हिरवी रेषा?

काळ्या ढगास सुचताना

ओली पाऊस भाषा

घरटे का शाकारते

चिमण्यांना कसली घाई?

ढग वाहतो स्वप्न

होऊन तत्पर भोई

मी अथांग रिता होऊन

अदमास तुझा हेरतो

येशील तुडवत वाटा

माळरानी स्वप्न पेरतो

येतील हिरवे ऋतू

रंग ऊधळत सारे

मग गवसतील मलाही गीते

तुझे काळीज हुरहुरणारे...

"やraτa प"

www.prataprachana.blogspot.com

२४.७.२०२३