रंग बरसत असेल......

रंग बरसत असेल.....

आज खुप दिवसांनी 

"इंद्रधनू" एक पाहीला

सांजेसवे बुडून गेला 

आभास नुसता राहीला

आभाळल्या क्षितीजावर 

त्याने उधळले सप्तरंग

मनात उठले अनाहूत

ओले माळरानी तरंग

तुझ्या आभासाचे इंद्रधनू 

माझ्या आकाशी पसरले

अंधार गडद होवूनही ते

लुप्त होणे विसरले

काळ्या ढगांनी पावसाच्या

हा रंग कसा उधळला

नुसत्या तुझ्या आभासाने

माझा सांजकाल उजळला...

मी रंग घेतले तुझे

आठवणी केल्या रंगीत

भुरभुरणारे थेंब तुषारती

ओल्या पावसाचे संगीत 

मी थेंबझडीत ऊभा

तुजरंगाचा वर्षाव पाहीला

मनात माझ्या ओसंडून

का पाऊस असा वाहिला 

तो अल्पावधीतच असा

तुला पेरून गेला

रिक्त पोकळ्या मनात माझ्या

तुला भरून गेला

बहुधा पुढच्या मोसमात

तो असाच अवचित दिसेल

कोसळणारा पाऊसही मग

रंग बरसत असेल..

(प्रताप)

"रचनापर्व "

माझी पावसाळली कविता....

29/9/2019

prataprachana.blogspot.come