राधेस बोल लागे....

चंद्रफुलाच्या छायेमधला

एक उसासा घेऊन आलो

चांदचकोरी कथा बिलोरी

हृदयी तुझ्या मी लिहून आलो

किती कवडसे वितळून झाले

तुझ्या हातच्या तळव्यारेघा 

किती विणवतो प्राक्तनाला 

सांधून देण्या व्याकुळ भेगा

ही तिरीप काळीज हसरी

झाडाचे शिवार हलते

एकल चंद्रउजेडी आता

मनात काही सलते

कशास रहावे अबोल

जशी अमेची रात

दे ना पेरून हृदयी

चंद्रचकाकी बात 

कृष्णकुळाच्या हाका दाटता

पाय नसावा मागे

वेणूचा दोष कसला

राधेस .....बोल लागे

("やaraτa ₱)                           

www.prataprachana.blogspot.com

प्राक्तन गाठी

एक कोरला रस्ता 

चाले सुना सुना 

गाठण्या अंतरीच्या

व्याकुळ ओल खुणा

संगतीस शब्द छाया

झेलते एकट ऊन

हवेत दाटून असते

आठवाची मूक धून

संपत नाही चालणे

हाकांच्या पाठीपाठी

सोडवण्या गहिऱ्या

प्राक्तांनाच्या गाठी

("やaraτa ₱)                           

www.prataprachana.blogspot.com

पान्हा...

भर दुपारी रित्या गावात 

भुकेजली तहानली मुले 

पान्हावल्या उराने दूर

आया वेचती फुले

झाडोऱ्यात घुमती

केकाजले टाहो व्याकुळ

लगबगीने पाय उचलून

गाठून घेते गोकुळ

दुधास उरीच्या होते

अमाप पान्हा घाई

रीती होऊन अख्खी

संपृक्त होते आई !!!

मातृदिन-2025 

("やaraτa ₱)                           

www.prataprachana.blogspot.com

मरुस्थळातील हात

ओलांडून कितीक जातो 

तो शहरे, कसबे, गाव 

रोखून मनात असतो

वेशी आतली धाव

तुडवत मरुस्थाळांना 

तो गातो हिरवे गाणे

हारीने रचत जातो 

आठवां ची मरुद्याने

पांथस्त कोणी पिईल

ओंजळीने निळे पाणी

ओतणाऱ्या घड्याचे हात

होतील आबादाणी

("やaraτa ₱)                           

www.prataprachana.blogspot.com

चिनाब सागर

फुटका घडा कुणी हा 

हाती देऊन गेले ?

वाहत्या 'चिनाब "धारी 

स्वप्ने वाहून गेले

जाड थराच्या भिंती

सुनी हवेली खिन्न

खळखळ चिनाब पाणी

झाले मूक सुन्न

पाण्यात बुडून गेली

जीव वाहती घागर

महिवाल सोनी  हृदयी 

चिनाब झाली सागर

("やaraτa ₱)                           

www.prataprachana.blogspot.com

स्वप्नवर्दी

लपलेली चंद्र कोर 

झावळीच्या आड 

चांदणरंगी उभा

शांत एकला माड

झूळूकीच्या स्पर्शरेषा

चांदव्याची त्यावर नक्षी

आकाश निळेनिळेसे

भासे किती सुलक्षी

हळुवार घटिकेच्या

पावलांना बिलगे झोप

आठवांच्या सहाणे वरती

आभासी चंदन लेप

अर्धमिटल्या डोळ्यात या

चंद्र कोर दाटे अर्धी

पापण्यांना मोरपीसरी

स्वप्नांची मिळते वर्दी

("やaraτa ₱)                           

www.prataprachana.blogspot.com

उमाळी धिर

मोहमुठीत माझ्या 

आठवाची रेती

लाटा मनातल्या

सागर सांगताती

उधाण मुके मुके

स्थिर निळी चर्या

वरवर उगाच शांतावा

दाखवी खोल दर्या

गलबंताना देतो किनारे

स्वतः तिथेच स्थिर

धावत्या नदीस का इतका

भाव उमाळी धीर?

सीगल भावनेचे

शोधती डोलकाठी

गीत पाचू बेटाचे

शीळ तयांच्या ओठी

("やaraτa ₱)                           

www.prataprachana.blogspot.com

फांदीहाक

झाड धरून अंतरी

पाखरचोची सूर

ढोलीत काहूर दाटके

पक्षी दूर..... दूर

येईल फिरून बहर

आणीक गेली पाखरे

फांदीवर उमलून आली

एक हळवी हाक रे!

("やaraτa ₱)                           

www.prataprachana.blogspot.com

काटेसावर होऊ!

ये ना करू आपण

आपल्याशी हळवे सुले

सावरीच्या फांदीवरली

जणू पंचकळ्याची फुले

असो अंगभर काटे

गळलेली सारी पाने

तरीही फांदीवर उन्नत

हसते फुल धीराने

तापलेल्या वैशाखाला

रंगीत छटा देऊ

जगण्याच्या धावपळी

चल काटेसावर होऊ!

("やaraτa ₱)                           

www.prataprachana.blogspot.com

वळिव....

गडगडाटी वळिव अनाहुत

विरळ बरसून गेला 

जीव मातीचा तसाच तृष्ण

पाण्या तरसून गेला

किती गर्जना त्याच्या मोठ्या

मातीची हाक विरली

दग्ध विरहाच्या तप्त झळ्यांनी

माती मूक झरली

उगाच कशाला त्याने येऊन

राघू वाटा मोडल्या?

आल्या गेल्या पावलांच्या

नक्षी त्याने खोडल्या

मी देऊ कसले दाखले

कितीदा येऊन गेलो

उमटल्या 'येत्या' खुणा कुठल्या?

निराश पाहून आलो....

("やaraτa ₱)                           

www.prataprachana.blogspot.com

ढग नाहीसे

कविता अशाच माझ्या

जणू जळत्या वाती

हिरवळ देण्या सृष्टी

जणू तापते माती

थेंब एक पुरेसा 

जिवन तिला पेरण्या

शब्द घेरून घेती

भाव मनीचे घेरण्या

नाही सापडत काही

ती अंतरंगात शिरते

स्वतःस पकडण्या चपखल

जणू वावटळ फिरते

रोज नव्याने लिहणे

शोधण्या.नवे काहीसे

पाऊस पडून जणू

होतात ढग नाहीसे 

("やaraτa ₱)                           

www.prataprachana.blogspot.com

मुक ललकारी

कोसळला पारिजात

धरणीस पालवी फुटली

गंधाला कवेत घेण्या

हलकी झुळुक सुटली

गंधकणाची सतार

छेडते सुगंधी राग

काळीज देठी माझ्या

येते हलकी जाग

हे एकट वेलीपासून

असे काहीसे तुटते

ललकारी पाखराची

मनास मुक फुटते

("やaraτa ₱)                           

www.prataprachana.blogspot.com

आतूर पारवा

प्रदीर्घ पल्ला गाठुन 

फिरले उदास पारवे 

उष्ण झळ्याचे प्राक्तन 

शिखर माथी गारवे 

हुरहूर घेऊन आले

मोडत पंख वाटा

दुरून वळून बघती

शिखराच्या उंच ललाटा

कोण साधू तेथे

लावून समाधी होता

पारव्याचा खोपा बहुधा

तेथे आधी होता

भेटो साधूस सिद्धी

पारव्यांना मिळो विसावा

साधुच्या काळजात ही

आतुर पारवा दिसावा

("やaraτa ₱)                           

www.prataprachana.blogspot.com

दूरचे निर्माल्य

टिपून घे तू सारे 

जे कधी बोललो नाही 

दाटते मनी उदासी

तिला तोललो नाही

मी भाव फेकला दूर

तो पडला माळरानी

गवत फुल ना खुलते

कुठल्या फुलदाणी

तरीही रानफुलाला

स्वतःचा अनाम रंग

ते निर्माल्ये दुरून वाहिले

गाभारी पांडुरंग!

("やaraτa ₱)                           

www.prataprachana.blogspot.com

चांदनराई

काळजातला प्रेषित 

सूळ हसून वाहतो 

गात्रात उमटल्या वेदना 

दूरुन मुक्याने पाहतो 

भासाच्या खोल दरीतून 

येते आण कानी 

जणू अज्ञात शिंपडे

देहावर देवदयेचे पाणी 

नखशिखांत ओले होण्या

सागरहिंमत ठायी

अवकाश काळीज होतो

फुलण्या चांदनराई

("やaraτa ₱)                           

www.prataprachana.blogspot.com

काळीजकुळी नक्षी

रेखल्या किती मी येथे

काळीज कुळाच्या नक्षी

ओलांडून तरीही जाती

स्वतःत गुंतले पक्षी 

("やaraτa ₱)                           

www.prataprachana.blogspot.com

हवाली

मोह माया त्यागून
फुल हसते गाली!
गंध करते मुक
खुडत्या हाता हवाली




("やaraτa ₱)                          
www.prataprachana.blogspot.com

रानहुरूप

शोधती पाखरे 

गळलेली पाने 

पंखानी पाहती

उदासली राने

जलकंपी सुराने

विराणी फिरे

वाळक्या झाडात

तुटलेली घरे

करती जमा

एकेक काटकी

धरा अन्नपूर्णा 

जरी झोळी फाटकी

देईल ती पुन्हा

रानाला हुरूप

होईल सारे

साऱ्यांना सुस्वरूप

("やaraτa ₱)                           

www.prataprachana.blogspot.com

विसाव्याची गाणी

उदासला दिन

आग पाखडतो रवी 

पाखरे शोधती 

सांज छायेची छवी

नदी विसावते

स्वतःच्याच काठी

पाखराचे गीत 

खुले चोचीच्या ओठी

तापलेली भुई

पाहे चांदण्याची वाट

चांद चकाकुन येईल

चुंबन्या ललाट

हळुपावलाने सांज

येते माळरानी

निमत्या श्रष्टीला फुटती

विसाव्याची गाणी

("やaraτa ₱)                           

www.prataprachana.blogspot.com

मैफल

पैंजणवाटा सुन्या 

मुरली राहे मुकी 

जळत्या सूर्याखाली 

सावली ना सुखी 

प्राण ओतूनी शब्द

घडतात किती सुराने

भाव तरी अंतरी

भयदाटके विराणे

द्वारका तळ गाठे

कृष्णाची पारध होते

सुनी सुनी मैफल

कवितेचे प्रारब्ध होते

("やaraτa ₱)                           

www.prataprachana.blogspot.com

                                             

नजरदिवे

भाव माझा सोयरा
शब्द माझा सखा
हाकेचा वरचा सूर
निनादतो मुकमुका

कृपाळ माझी भाषा
भलती सुघड बोले
अंतरात वहीच्या ठाई
शाईचे डाग ओले

मध्य गाठते रात्र
झूळूक सुकवते शाई
शब्दांना घेरून येते
कवितेची निनाद घाई

पळसबनाला स्पर्शती
चांदण्याचे नजरदिवे
झाडाला लगडून येते
फुल एक नवे!



("やaraτa ₱)                          
www.prataprachana.blogspot.com

कवितामेळा

मनी निनादत असतो
कवितेचा घुंगरवाळा
जणू पुकारे नामदेव
वारकऱ्यांचा मेळा

दिंडीत निघती शब्द
कितीक त्यांचे घाट
एक विरहिणी जनी
दिंडीस दावते वाट

अशी चालते वारी
जणू स्वर्गघाई
अंतरी अबीर गुलाल
विठ्ठल दाटका ठाई

ना होते मुख दर्शन
कळस दुरून दिसतो
भावविभोर दिंडी परते
विठ्ठल हलके हसतो

अंतरीची विठ्ठलतृष्णा
कधीच संपत नाही
नित्ये आतली आस
नवनवा अभंग वाही!



("やaraτa ₱)                          
www.prataprachana.blogspot.com

तडे

अश्या एकट क्षणाना

नको विरहाचे धडे 

विस्तारत जाती खोल

काळजाचे तडे 

रानदिव्याला या नको 

वणव्याची छाया

पाखरांची झोप

जाईल ना वाया

कशाला दूर

तुझ्या गावाची वेस

तडा एक एक 

होई कासाविस!

("やaraτa ₱)                           

www.prataprachana.blogspot.com

स्वतः

स्वतःच द्यावा
स्वतःला हात
तोडून परीघ
दुःखावर मात

स्वतःच व्हावे
स्वतःचा प्रकाश
सारावेत दूर
अंधाराचे भास

व्हावे असे काही
देवालय जणू
कृष्ण ओठी बिलगाया
स्वतः यावी वेणू!



("やaraτa ₱)                          
www.prataprachana.blogspot.com

मकरंद

फुलोरा गातो अंतरी
शिशिरगळीचा राग
अंतरातला गंध त्याचा
इच्छितो पाऊलमाग

मुळात त्याच्या राहते
तुझ्या आसेचे पाणी
फुलास बिलगुन असतो
रंग आसमानी

दे तयांना उसना
तुझ्या गिताचा गंध
पुढील चैत्रापावेतो
तगेल मग मकरंद..


("やaraτa ₱)                          
www.prataprachana.blogspot.com

चाप...!

दिनदुबळया साऱ्यांचा
तू कनवाळू बाप
शोषणकर्त्या विरुद्ध
ताणल्या बंदुकीचा चाप!


१४ एप्रिल २०२५
("やaraτa ₱)                          
www.prataprachana.blogspot.com

राजपथ!

तू गावकुसातून, नसानसातून
पेरून गेला क्रांती
राजपथावर तुझा पायरव
घेऊन आला शांती

हे राष्ट्रविधात्या प्रज्ञासूर्या
तुझा आम्हा अभिमान
राष्ट्रभान तू दिले भारता
देऊन संविधान!!

१४ एप्रिल २०२५
("やaraτa ₱)                          
www.prataprachana.blogspot.com

पथिकमुक्ती!

अंतावरच्या पथिकालाही

तू खुले केलेस राजमार्ग

तू हाटाहाटातुन, गावकुसातून 

पेरुन दिलास स्वर्ग

तुझ्या ज्ञानचक्षुनी तू

अंधार भेदला भारी 

तू कैक पिढ्याचा दाता 

तू हर दुबळ्याचा कैवारी!

१४ एप्रिल २०२५

("やaraτa ₱)                           

www.prataprachana.blogspot.com

बा !माई!

दवापाण्यावाचून स्वतःच मुल मातीआड गेलं

तरी तू झुंजत राहिलास अढळ

मानवता मातीआड जाऊ नये म्हणून!

तुझ्या त्या मुकल्या बाप पणाची भरपाई म्हणून

आम्ही कोटी कोटी लेकरं अभिमानाने

तूला आमचा बाप आणी कुळाचा कुलपुरुष मानतो!

बाळपणापासून तू वाढलास आईविना

तरी तू अनंत यातना झेलूनआम्हावर 

मायेचं आभाळ पांघरलंस

तू आम्हास पोरकं सोडलं नाहीस

त्याची उतराई म्हणून आम्ही सारी लेकरं

तूला आमची आई मानतो!

आम्ही आहोत का तुझ्या वंशाचे दिवे

ते ठरेल इतिहासाच्या साक्षीने.. पण तू

आमचं कुळ मूळ नक्की राहशील!

१४ एप्रिल २०२५

("やaraτa ₱)                           

www.prataprachana.blogspot.com

हाक एकली

ते फुल कुठले होते

जे कडेकपारी फुलले

डोंगर सारे स्थिर 

पायतळातून हलले

फुलास व्यापून आले

हिरवे द्विदल पाते

हवेत दरवळून वाढे

गंधबावरे नाते

नजरेपल्याड फुलूनी

एकटेच ते झुरते

डोंगर पायथ्याला

हाक एकली फिरते...

("やaraτa ₱)                           

www.prataprachana.blogspot.com

सुरेल विराणी

मठ उदास उदास

जोगीया निघाला

नको साजन दोष

देऊ तू जगाला!

पायतळात गं त्याच्या

भस्माचे ढीग

अंतराच्या वारुळाला

आठवांची रिघ

अस्तावर त्याची

चाले आरंभ पेरणी

नको मांडू तू रमल

ना जमेल सारणी

तुझ्या अंगणात त्याची

घुमेल भिक्षान्देही

तू गाशील विराणी

मग सूरेल आरोही!

("やaraτa ₱)                           

www.prataprachana.blogspot.com

चांदउदयीनी

तू सांधून घे ना मेळ
ही चांद उदयीनी वेळ
नकोस ठेवू फडताळत
भातुकलीचा खेळ

पहा उगवला चांद
भरला काजव्यांचा मेळा
चांदण्याच्या अदमासाला
सांजेचा ठोकताळा

धरा पहा चंदेरी
शालू नेसून बसली
कविता माझी सावळी
चंद्र किरणात हसली

लाव दिवा तू दारी
पडू दे किरण सडा
वाजू दे अंतरी अव्यक्त
आठवांचा चौघडा!


("やaraτa ₱)                          
www.prataprachana.blogspot.com

कटाक्षामागे

सुघड पाषाण जततो
मुर्तिचा फुलमाग
पायरवाच्या मुहुर्ती
ये शब्दास माझ्या जाग

फुलपाखरी चाहूल
हृदयास माझ्या लागे
शब्द वाहण्या स्वतः
निघती कटाक्षा मागे...!



("やaraτa ₱)                          
www.prataprachana.blogspot.com

पक्षी....

मनाची सावली
शब्दावर नक्षी
शांतावेत बनात
तहानले पक्षी...



("やaraτa ₱)                          
www.prataprachana.blogspot.com

नयनतळी

शब्दांचे फुलदेठ
कवितेची कळी
फुलाचे प्रतिबिंब
गर्त नयनतळी....


("やaraτa ₱)                          
www.prataprachana.blogspot.com

सत्यशोधन

'सत्यशोधनाची',न सोडावी वाट
होई भरभराट,  बहुजनाची ।।
                     ꧁༒प्रताप༒꧂






म.फुले यांना विनम्र अभिवादन!

संगम

मला विसर्जित करायचा आहे
या विरहाचा अस्थीकलश
आप्तास माझ्या दूरच्या
प्रीतीसंगम सापडत नाही!



("やaraτa ₱)                          
www.prataprachana.blogspot.com

अहिस्ता

ताऱ्यांच्या पल्याड असेल 

एक फुलांचा रस्ता 

आणिक पूर्ण चांद 

नित्ये ये आहिस्ता!

("やaraτa ₱)                           

www.prataprachana.blogspot.com

कवितेचा स्वर्ग

मनाचा सगुण देह 

भावांचा आत्मा वसतो

कवितेचा मिळवून स्वर्ग

हलकेच स्मित हसतो!

("やaraτa ₱)                           

www.prataprachana.blogspot.com