आठवणींचे भोग...

या लहरी ही आवर्तने..
तुला आठवण आली?
कविता माझी उधाण
शब्दांची गाठते खोली

मी चैत्र पाहतो फांदी
रावा परतुनी आला
दुर ढगाच्या कुशीत
उडे पक्षांची रेखीवमाला

झाड मागे फुलांना
बहराची रंगीत ओळख
शब्दांने पेटवत असता
आठवणींचा काळोख

या तपस्वी संध्याकाळी
धुपते आठवणीची धुनी
पिंपळाच्या झाडाखाली
हा दिप ठेवला कुणी?

उजेड घेवून शब्द
शोधत तुला निघती
नित्य संध्याकाळी मी
बनतो तुझा जोगती

दाटून येतो मनी
तुझ्या आभासाचा जोग
कविता माझी भोगते
तुझ्या आठवणींचे भोग.....
(Pr@t@p)
"रचनापर्व"
www.prataprachana.blogspot.com
५ एप्रिल २०२२