गीत हाका-यांचे...

मशिदीच्या घुमटावरती
अजान वेळी पारवा
गर्द धुक्याच्या अंतरी
सांयआरतीचा गारवा

अशा पुकार घडीला
चांद उसासून निघतो
एक कोणाचा देव या
व्यथालयास बघतो

जोडलेले उंचावलेले हात
असे काय मागणे?
देवचाफ्याचे त्यावेळी
एकेक फुल त्यागने

अशा विभक्त घटीकेवर
मी तुझे दान मागतो
अजाण तुझ्या शहरावर
मग चंद्र बनून जागतो

उजेडात या कधी
येईल का अनाहूत चांदणे?
किती युगे चालेल हे
अदृश्य प्रार्थनालयाचे बांधणे?

कोरतो आहे मी शिल्प
आर्त पुका-याचे...
पोहचेल कधी तुझ्या अंतरी
गीत माझ्या हाका-यांचे...??

○ प्रताप ○
"रचनापर्व"
www.prataprachana.blogspot.com
१२.१२.२०२२