सावटाचा वसंत.......

हा सावटांचा वसंत
बहर वाटत नाही
पानगळीचे भय मनातुन
किंचीत सुटत नाही

आले अंकुर 'अस्पर्शी'
चैत्र उदास वाटे
स्पर्शाचे पंख मखमली
त्याला मृत्यूचे काटे

या हंगामात असा
'अस्पर्शी' मोहोर कसला?
कोकिळेचा आवाज दबका
जणू हुंदका फसला

माणसे, बहर,मोहोर
सारेच झाले बंदी
तरी सजवते कोवळीक
हरखुन ही फांदी?

होईल कदाचित मुक्त
हे वसंताचे दान
आणी मुक्त होईलही
कदाचित गुलमोहराचे रान
(प्रताप)
1/4/2020
#कोरोनाची अस्पर्शी कविता#