दुवे कवितांचे....

कोणे एके काळी
या देहाच्या ढोलीत
रहायचा एक सामान्य पक्षी..
तो नित्य निघायचा,परतायचा
दाणे टिपून
घोट दोन घोट पाणी पिऊन
निजायचा ढोलीत गुमान
आणी एके दिवशी तु
'क्रौंच-कारूण्यी' कटाक्ष
टाकलास...!!!

आता तो...
नित्य भरकटतो
शब्दबाधा झाल्याने तो
नित्य शोधतो कविता
आकाशभर...
ढग,चांदणे, मावळती
वाळवंट,नदी,तळे, फुल पान
असं पाहतो काहीबाही...
ढोलीत ठेवतो जपून
त्यांची एकेक वेदना फुले...
आणी झेपावतो पुन्हा ...
अज्ञाताकडे....स्थितप्रज्ञ..
काय माहित ....?
कुठल्या महाकाव्याच्या शोधात...?

शब्दसखे...! तो पर्यंत
छतावर ठेवत जा ना
तुझ्या ओंजळभर पाणी....
आलाच कधी तो तृष्ण
तर विसावेल तो क्षणभर
आणी त्याचा तृप्त आत्मा
देईल तुला कवितेचे दुवे....
(Pr@t@p)
"रचनापर्व"
www.prataprachana.blogspot.com
१२ मे २०२२