रिती फांदी....

समयोचित अवरूध्दास
मी शरण जात नाही
आठवांचेही कदापी मग
क्षरण होत नाही

झुंजत असता पळांशी
मी ही अनावर शिणतो
तरीही कोण पक्षी
फांदिवर गुणगुणतो?

मोजत एकेक नक्षत्र
मी तुडवत चांदणवाटा
संथ नदीतळातल्या
थोपवत उन्मळ लाटा

मुक मनाने गातो
पक्षाचे राहिले गीत
व्याकूळ फांदिवरती
रितेपणाचे संगीत

झेपावून पंख तो
कुठल्या दिशेस जातो?
त्या पक्षाच्या आठवणीने
मी रिती फांदी होतो....

○ प्रताप ○
"रचनापर्व"
www.prataprachana.blogspot.com
२५.११.२०२२