चिमूटभर माती

भूपाळी

ही वेळ अशी का रिती?

चांद नभात ढळतो

हरणांचा रथ कुठे हा

अज्ञात दिशेला वळतो

राजकन्या कुठली वेडी

शोधण्या कुणाला निघते?

वैभव चांदण्याचे 

निळे निळे ती बघते

ती का अनाहूत थबके?

कोण जिव्हारी लागे?

ती अखंड अवकाश शोधे

स्थिर ध्रुवा मागे

मी ही अढळ उधळतो

प्रतिक्षा खुल्या आभाळी

अन् श्वास उमटवून देतो

तिच्या आभास भाळी

ती हळूहळू धुसरते

कोण दिशेला जाते?

हरणांच्या पदध्वनिची

आर्त भूपाळी होते...

                           ("やraτa ₱)                           

www.prataprachana.blogspot.com

  २० .१.२०२४

 

अक्षरे

वाजती का अंतरी

आठवांचे चौघडे?

खोल उसासे दडपून 

इथे काळजाला तडे

वणवण फिरती येथे

भूगर्भातील झरे

उगवून पृष्ठी येती

कवितेतली अक्षरे

घे ओटीस ही फुले

नकोस खचवू माती

झाक पदराखाली

हे व्याकुळ शब्दमोती

का कुशीला उगवे?

तुझ्या आसेचे चांदणे

कायेवर सजून येते

अस्पर्शी हिरवे गोंदणे...

                          ("やraτa ₱)                           

www.prataprachana.blogspot.com

 १८ .१.२०२४

 

   

 

 

नामी दवा

दुःख अनाम अगतीक

त्याचा ना गवगवा

कोण फकीर कोठून

देईल नामी दवा?

सुजाण वेदना उभी

असते दारापाशी

तरीही हाक उमलते

होवून माहेरवाशी

अस्तविहीन चांदणे

देतसे मनाला धिर

कवने गात फिरतो

एक अवलिया पिर 

नित्य घडीस हवा

कावर बावर होते

शब्दांचे संयत हृदय

वेदनेचे माहेर होते

दुर गावची सजनी

शब्द माहेरी रमते

मंद उसासे तिचे

एकाकीपण गमते....

                          ("やraτa ₱)                           

www.prataprachana.blogspot.com

१३ .१.२०२४

रेशमी उखाणे

देठ नको ना तोडू!

संपतील उगवत्या वेदना

दिठीस बिलगुन घे तू

झाडाच्या संवेदना!

झड भले ही येवो

तु राखून ठेव चैत्र 

मी निभवून नेईन एकला

शिशिर झडीचे मैत्र

चल उगवून येवू दोघे

दगडाची भेग सांधू

अंधार वेलीवरती 

चांदण्याचे फूल बांधू

येवू दे स्फटिक गंध

रात उजेडा नेऊ

मी रम्य पहाटवेळी

तुझी भूपाळी होऊ?

साजि-या तुझ्या वाणीने

तु गाऊन घे ना गाणे

मी लिहून घेईन ईकडे

रेशमी तुझे उखाणे...... 

                          ("やraτa ₱)                           

www.prataprachana.blogspot.com

१२ .१.२०२४

राई राई

थिजते रान उभ्याने

होई हाकेचा गुंता

सांज किरमिजी उभी

नसे तमाची चिंता

त्या पैंजणध्वनी वरती 

सजते सांजफुलाचे गाणे

आकाशाच्या कुशीत 

चांदण्याचे जोंधळ दाणे

नक्षत्र आशेचे उगवे

त्याला संकेताचा पान्हा 

शुभ्र झोळीआड मीरेच्या 

हसतो शामल कान्हा

मी ओंजळ धरुन चाले

शिवतो तिला वारा

दान कान्हा देतो

ओंजळीत तुटला तारा....

रास अशी तुटक्यांची

घर भरले बाई!

रात नभात भिनते

मंद राई राई

                             ("やraτa ₱)                           

www.prataprachana.blogspot.com   

 ११ .१.२०२४

 

इंद्रधनु तमात सजतो

रात भेगाळते अशी

जसे टिचकते काकण

जरी झाकले डोळ्यावरती

पापण्यांचे झाकण

निरांजनाच्या वळचणीला

अंधार मूठभर सांडे

अर्धउजेडी गात्रात माझ्या

स्वप्नांचे रंगीत तांडे

बकूळ झरतो दारी

निद्रिस्त होता केवडा

मी गंधभारला होतो

निशीगंधाच्या एवढा

अंगाई का सुचते?

मोरणीच्या मना

मी भूईवर रेखत असता

मोरपिसारी खुणा 

का कसे मला

घनघोर अंधार सोसवे?

जळल्या वातीतून झरती

काजळरंगी आसवे

ओल मनाला फुटते

कैफ हळुवार निजतो

दिवा अलगद विझूनी

इंद्रधनु तमात सजतो...

                          ("やraτa ₱)                           

www.prataprachana.blogspot.com

१० .१.२०२४

 

  

स्तब्ध पाश

हे संमोहन टिपेला

जिव एकला झुरे 

गर्ततळाच्या हाका जणू

बुडल्या द्वारकेची घरे

पृष्ठी वर्तुळ वाटा

त्यांचा काठावरती नाश

अनंत सागरा भोवती

किना-यांचे स्तब्ध पाश...

                           ("やraτa ₱)                           

www.prataprachana.blogspot.com   ९.१.२०२४

सुगंधी शेला

येशील कधी का असे

जणू राम मिथीला आला

ज्या भावघडी जानकीचा

शेला सुगंधी झाला

नयनात तिच्या का हसते

रघूकुळाचे पाणी

रामाचे हृदय होई

प्रितीची अत्तरदाणी

विभक्त ठरे ना काही

एकात्म सारे वाटे

फुलती प्रित फुले

शमती वनवासाचे काटे

                          ("やraτa ₱)                           

www.prataprachana.blogspot.com

   ७.१.२०२४

पद्मताटवा

सिध्दार्थ दाटला येथे

कलिंग झरते आहे

महावस्त्र सम्राटाचे

मुक विरते आहे

उध्वस्त समशेरीला 

आकांत असा हा फुटला

दंभ दाटला स्तंभ !

आकांत भारे तुटला

आक्रोशाला आली

संवेद हाकेची वाणी

रक्तमातीवर झाकतो

चिवर पद्मपाणी

हिंसा निमाली येथे

बुध्द भेटण्या आला

महावीर नश्वर इथला

शिलालेखी अक्षर झाला.....! 

हर युध्दभुमीस इथल्या

बुध्द स्फूरून यावा

शांतीच्या पद्मताटव्याने 

'दंभ' हरून जावा! 

                          ("やraτa ₱)                           

www.prataprachana.blogspot.com

 २.१.२०२४

अवघडतो

दुःख उमगते बाई

मला तुझ्या मनीचे

जात्यावर जणू फिरती 

अभंग आर्त जनीचे

घन सावळा व्याकूळ 

सांज समयी विरतो

तुकयाच्या रस्त्यावरती

विठ्ठल वेडा फिरतो

मी व्याकूळ अभंगदिंडी

राऊळी घेवून येतो

तुझा पांडुरंग हळवा

दिंडीत धावून येतो 

चंद्रभागा तिकडे हसते

जिव जनीचा रडतो

हृदयातला धावा

व्याकुळून अवघडतो....

                          ("やraτa ₱)                           

www.prataprachana.blogspot.com

 २९ १२.२०२३ 

वाट....

वाट हरवली सजने

धुक्यात बुडला रस्ता

आभास नेतो मजला पार

हळूवार ....अहिस्ता....

मी स्वप्नपडीच्या वेळी

वाहून देतो निद्रा

निळ्या गर्द रातीवर

तुझी उमटते मुद्रा

मी चांदठशाचे माग

ढगास दान देतो

तु वेढल्या वेळी

मी झांजर धुके होतो

हाक तुझी उमटते

येते आठवांची लाट

विलीन होते परस्परात

तुझी..माझी...वाट

                            ("やraτa ₱)                           

www.prataprachana.blogspot.com

   २८. १२.२०२३ 

 

ओकेपण

शिशिर उभा हा दारी

बहर निघाला गावा

ओक्याबोक्या झाडांचा

पानफुलांचा धावा

गिरकी घेवून पाने

निघती चुंबन्या धरती

फांद्याचे निरोप हळवे

अंतरात हुरहूरती

तु बहर नको ना नेऊ

चालत शिशिरा मागे

झाडांचे करडे ओकेपण

मनास माझ्या लागे

 

           

            ("やraτa ₱)                           

www.prataprachana.blogspot.com

                    २३. १२.२०२३ 

  

पैलतीरावर मोह

दुःख नदीवर आले

पाणी भरण्या ओले

काळीज तयाचे तेथे 

ओले पाणी झाले

माठ कुणाचा तेथे 

असाच राहून गेला?

निद्रिस्त यशोधरेला

जणू सिध्दार्थ पाहून गेला

ढग ही आभाळातला

नदीत बुडून जातो

त्याचा शिरावळाने

थवाही उडून येतो

मी तम उधळून नभावर

नदीत चांदणे वाहतो

दुःख सागरा निघाले

काठावरूनी पाहतो

लाटांच्या खाली उमटती

मंद हाकांचे डोह

मी ऐलतीरावर उभा

पैलतीरावर मोह !

                        ("やraτa ₱)                           

www.prataprachana.blogspot.com

 १६. १२.२०२३ 

  

अज्ञाताचे चांदणे

धागा धागा जुळे

कसा तो न कळे...

जसे अज्ञाताचे चांदणे

जपते अवकाश निळे

चालत चालत येते

बहराची निर्मळ वाणी

निपचितल्या शब्दामधूनी

प्रेमाची चाहूल गाणी

प्रेम आपूले पुर्वज

कसले आपले नाते?

मिलनाचे संकेत हळवे

शब्दात दडले होते

वेच कळीचे शब्द

दे प्रतिभेचे दान

होऊ दे कवितेला

व्याकुळ! बेभान!

                  ("やraτa ₱)                           

www.prataprachana.blogspot.com

                    १०. १२.२०२३ 

दिगंत

जरी मावळे दिनकर

आस उद्याची त्याला

अनंत वंचित नभाचा

तु अखंड सुर्य झाला

तु पथ किरणांचे दिले

कधी न त्यांचा अंत

प्रज्ञासुर्याच्या किरणाने

आबाद हे दिगंत!

#महामानवास वंदन

                  ("やraτa ₱)                           

www.prataprachana.blogspot.com

                    ६. १२.२०२३ 

विहरणारे...

गर्द धुके ना सरते

सुर्य कुठे हा दडतो?

खोल मुळातून वृक्षाचा

जिव पहा अवघडतो

घनघोर एकांताला

फुटे ना कुठली भाषा

मी अवकाशाला लावतो

माझी ललाट रेषा

कसली किनार चंदेरी

या भाळास ये चकाकी

माझ्या काळोखाला 

मग स्वप्नांची लकाकी

कोण मोडते स्वप्न 

सलग शहारणारे?

मी दुरुन न्ह्याळतो पाखरे

तुझ्या अवकाशी विहरणारे....

                 

               

                       ("やraτa ₱)                           

www.prataprachana.blogspot.com

 ५. १२.२०२३ 

तुटका ....

आसुस धुके हे करडे

हळू हळू बघ निवते

पंखांची आसूस फडफड

अवकाशाला शिवते

कोण पारधी कुठला

पसरून बसला जाळे?

काढून घेतले कोणी

स्वप्नाचे घुंगरवाळे?

बकाल नदीच्या अंतरी

स्वप्नाचे वाहे मंतर

सागर मोजत असतो

नदीस पडले अंतर

या झांजरसांजर वेळी

का हाका अशा फुटाव्या? 

लाटांच्या लहरी जात्या

जणू किना-याहून तुटाव्या

तुटली लाट कितीदा

सागर कवेस घेतो

लाटांच्या तळाखाली

सागरही तुटका होतो.... 

                          ("やraτa ₱)                           

www.prataprachana.blogspot.com

     ४. १२.२०२३ 

                

 

आस दरवळ

झाडाच्या सावलीला

फुल कधी का लागे?

ती चालत निघून जाते

मंद प्रकाशा मागे

झाड दुःखी विरते

अंधारदिव्याच्या तळी

तेवत नयनी स्वप्न 

बहराचे मृगजळी

तु का उजवते फांदी

अशा दाटल्या राती?

फुल उसासून चुंबते

दवात भिजली माती

दुःख तयाचे नित्य

मातीवर व्याकुळ पडते

अशा फुलसड्यावर 

प्रित तुझी मग जडते

अशा फुलझडीची 

तुझ्या देव्हारी रास

नित्य रामप्रहरी तेथे

दरवळते माझी आस.....

                                  ("やraτa ₱)                           

www.prataprachana.blogspot.com

           २९. ११.२०२३ 

 

धुकेरी एकांत...

धुक्यात चंद्र वाहे
नयनात ढग थिजतो
ओल्या पाऊस वेळी
एकांत अवघा भिजतो

चंद्र उभा व्याकुळी
जणू मिरेची विणा
शामलकांती नभी
शोधत गिरधर खुणा

दुर दरीतळाला
वाट तमात बुडते
स्वप्नांची काळीजमाया
तुझ्या आभासी जडते

कसे कुशीस घेवू
हे भुरभुरणारे धुके ?
आक्रोशती हाक माझी
मौनात स्तब्धे मुके

एकांताचे भोग तू
दिले शब्दांच्या भाळी
कशा विराण्या गाऊ
अशा धुकेरी वेळी?

मुक धुक्याच्या संगे
चांद नभी एकला
असला कसला आकांत
तु झोळीत त्याच्या टाकला.....?

                ("やraτa ₱)                          
www.prataprachana.blogspot.com
                    २८. ११.२०२३



 

हुरहूर थवा

अज्ञात गाठण्या निघती 

हे कावर बावर थवे

नयनात तयांच्या चांदणे

हृदयात काहूरी दिवे

तु तुझ्या दिशेची सावर

झाडांची निजली छाया

पानावर उजळून येईल 

चंद्रव्याकूळी माया 

मी कुशी तुझी का शोधू

थव्यास उसंत देण्या

की बहरून उगवून येवू

सडा फुलांचा होण्या?

अवरुध्द घटिका स्तब्ध 

कंठ तुझा का दाटे?

अव्यक्त प्रारब्ध आपले

व्याकुळते स्वप्नावाटे

चांद नभाला शिवतो

निशीगंध तयात भिनतो

अवकाशाच्या मलमलीची

मी नित्य कविता विणतो

या तलम गोजी-या हाका

दुर दिशात विरती

ही किती युगाची भिरभिर 

थवे व्याकुळी फिरती......

मिळू दे उसंत थव्याला

घे ना हाक उराशी!

शांत मंद होईल 

हुरहूर मग जराशी!

                         ("やraτa ₱)                           

www.prataprachana.blogspot.com

 २६. ११.२०२३ 

धिर व्हावा

घनश्यामा ये तु तत्पर !

राधा झुरते आहे

कळ तुझ्या बासरीची

अंतरात स्फुरते आहे

भेट अशी ती व्हावी

अनंत कवेस यावा

उगवल्या चंद्रास नभी 

फुटो चांदणधावा

एकात्म सारे व्हावे

विलग उरो ना काही

विरुन एक व्हाव्या

बहूमुखी दिशा दाही 

स्वत्व तुझे व्हावे

एक सुर व्हावा

तो पावेतो तगण्याचा

मला धिर व्हावा!

                            ("やraτa প")                           

www.prataprachana.blogspot.com

१८. ११.२०२३ 

 

 

साजन खुणा

ढग चालले चालले

न्ह्याळत साजन खुणा

आणी स्पर्शिती डोंगर

आठवणींचा जुना 

दिसतो एक पारवा

शोधत अजाण खोपा

युगायुगाच्या अंतराने

त्याच्या काळीजखेपा

दुर सजनी एकली

क्लांत आठववेळी

बट एक स्थिरावे

तिच्या उन्नत भाळी

हात उगाच काहूरे

चेह-याचा अधिर भास

या सांजेस गुलाबी छटा

भवती तुझा सुवास....

                          ("やraτa প")                           

www.prataprachana.blogspot.com

 १५. ११.२०२३ 

दरवेशी

या साजनवाटा भिनती

जणू धुक्याला रंग

मी सांजनयनी पाहे

तमाचे काजळी अंग

तु सांडुन जाते सारे 

माझ्या ओंजळी तारे

मी रातगतीचे चांदणे

रेखतो तगमगणारे

तू देत नाहीस हात

माझ्या रित्या हाती

मलूल एकट विझती

हृदयाच्या हळव्या वाती

दे ना चेत मनाला

अंधार जाचला असता

मी व्यापून असे काय घेवू?

तुच तु साचला असता

दे अखंड असे चैत

या हेमंती क्षणांना

तु दे अंतराळ अनंत

एकेका प्रेम कणांना

व्यापू दे अंतर्बाह्य 

ये असे एकदा कवेशी !

शब्दांचे नगर वसवेल

हा विरहांकित दरवेशी...

                           ("やraτa প")                           

www.prataprachana.blogspot.com

   ९. ११.२०२३ 

 

 

प्रेमझरे

दुवे कुणाचे वसले

आत्म्याच्या भावतळी

हुरहुरते भिरभिरते

माळावरती एक कळी

झुरझुर वाहते एकले

हेमंताचे व्याकुळ वारे

सोनफुलाचे काळीज

अव्यक्त हुरहुरणारे

फकीर कुठली गीते

झोळीत सावडून घेतो

एकांत जुलमी सखा

स्मिताने आवडून घेतो

गातो तीव्र निःशब्द 

तो शब्द आरास रचतो

कुण्या दुरदेसीच्या सजनीला

तो अनाहूत सुचतो

तो असतो आभास धुसर

तो नसतो वास्तव खरे

तरीही त्याच्या चाहुलीने 

तुझ्या अनंतास प्रेमझरे.... 

                           ("やraτa প")                           

www.prataprachana.blogspot.com

  ८. ११.२०२३