ओंजळदुव्यात...

या ओंजळदुव्यात तरळतो
तुझा हसरा नितळ चेहरा
लख्ख लकाकी देत दुव्यांना
जणू बावन्नकशी मोहरा

आळवू दे ना मला
तुझ्या प्रार्थनेची आर्त ओवी
अंतरातली हाक माझी
तुझ्या अंतरी विलीन व्हावी

उठावे प्रतिहाकांचे आवर्त
जणू यमुनासाक्षी बासरी
धुन उमटून मनात यावी
ओल्या नयनातुन मग हसरी

मी व्हावे तुझ्यात एकात्म
असे पसर तु बाहू
नदीतळातील हाकांना
सागरातुन कुठवर पाहू?


༄᭄प्रताप ࿐
"रचनापर्व"
www.prataprachana.blogspot.com
२८ .८. २०२२