अंतर...

जुळवू कसा यमक मी
तुला देवून शब्द सगळे
सारेच वाहून तुजला
उरेल काय ते वेगळे?

गाऊ कोणते गीत
सा-यात तुझेच तराणे
लोकगीतासम अज्ञात
भावही आपले पुराणे

हाक कशी रोखावी
हृदयाची वाढता गती
पुरातन ही आस
या युगातही जिती

कसे मिटावे डोळे
तु साकारताना मनी
दे ना तुही नयनभेट
या सांजव्याकुळी दिनी

कसे रहावते तुला
करत हे जन्मांतर?
सांध तरी जरासे... हे
अगणीत अगम्य अंतर.....



༄᭄प्रताप ࿐
"रचनापर्व"
www.prataprachana.blogspot.com
२८ .८. २०२२