चांदणसखी

आकाशगंगे खाली
रान चांदणे चांदणे
आठवांच्या गहिवराला
स्वप्नांची कोंदणे

सखीच्या डोळ्यात
चांदण्याचे रान
सागराची खोली
चांद होई बेभान

सखी चांदण्याचा भास
सखी शब्दांचा आस
मी समेटून घेई
सखीचा आभास

सखी सांगावा वा-याचा
सखी झुळुक मंद
माझ्या शब्दांचे आत्मे
त्यांना सखीचा तनूगंध

सखी रातव्याचा राग
सखी प्रतिक्षेची जाग
हरवल्या मनाचा
सखी होतसे माग

सखी शब्दांचे लेणे
सखी गजलांचा बंध
सखीच्या चांदण्याला
माझ्या अवकाशाचा छंद

सखी चांदवली रात
सखी दिव्याची वात
सखी उमटला भाव
सांजप्रहरी उरात

सखी आभाळाचे रंग
सखी रचले अभंग
सखीच्या चांदण्याला
माझा अवकाश दंग...

(Pr@t@p)
"रचनापर्व"
www.prataprachana.blogspot.com
९ जून २०२२