तळ्याचे निरव गाणे

प्रतिबिंब तरंगी वाहे
सारंगीचे गाणे
खोडास कंचहिरवी
बिलगून येती पाने

झाडाचे नशीब रंगीत
मोरपिसांची फुले
फांदीवरती बुलबुल
गीत तयास भुले

शब्दातुन एक रावा
बोलतो संकेतवाणी
वा-याची झुळुक वाहे
तळात दडली गाणी

तळ कसा गाठावा
नजरेस पडतो प्रश्न
तळे तुझे सांजरंगी
भासे मला मग तृष्ण

ओंजळ तळ्यावर धरता
तळ्यात लहर साचते
माझ्या शब्दाआडूनी
स्वतःस कोण वाचते?

भाव तुझे चांदण्याचे
माझ्या तळ्यात चिंब
सारंगाचे गाणे बनते
मग तळ्यातले प्रतिबिंब

तुझे तळे की माझे
कोणाचा तळ न लागे?
निजल्या निरव रातीस
दोन नयन मग जागे.....

(Pr@t@p)
"रचनापर्व"
www.prataprachana.blogspot.com
४ जून २०२२