आस दरवळ

झाडाच्या सावलीला

फुल कधी का लागे?

ती चालत निघून जाते

मंद प्रकाशा मागे

झाड दुःखी विरते

अंधारदिव्याच्या तळी

तेवत नयनी स्वप्न 

बहराचे मृगजळी

तु का उजवते फांदी

अशा दाटल्या राती?

फुल उसासून चुंबते

दवात भिजली माती

दुःख तयाचे नित्य

मातीवर व्याकुळ पडते

अशा फुलसड्यावर 

प्रित तुझी मग जडते

अशा फुलझडीची 

तुझ्या देव्हारी रास

नित्य रामप्रहरी तेथे

दरवळते माझी आस.....

                                  ("やraτa ₱)                           

www.prataprachana.blogspot.com

           २९. ११.२०२३ 

 

धुकेरी एकांत...

धुक्यात चंद्र वाहे
नयनात ढग थिजतो
ओल्या पाऊस वेळी
एकांत अवघा भिजतो

चंद्र उभा व्याकुळी
जणू मिरेची विणा
शामलकांती नभी
शोधत गिरधर खुणा

दुर दरीतळाला
वाट तमात बुडते
स्वप्नांची काळीजमाया
तुझ्या आभासी जडते

कसे कुशीस घेवू
हे भुरभुरणारे धुके ?
आक्रोशती हाक माझी
मौनात स्तब्धे मुके

एकांताचे भोग तू
दिले शब्दांच्या भाळी
कशा विराण्या गाऊ
अशा धुकेरी वेळी?

मुक धुक्याच्या संगे
चांद नभी एकला
असला कसला आकांत
तु झोळीत त्याच्या टाकला.....?

                ("やraτa ₱)                          
www.prataprachana.blogspot.com
                    २८. ११.२०२३



 

हुरहूर थवा

अज्ञात गाठण्या निघती 

हे कावर बावर थवे

नयनात तयांच्या चांदणे

हृदयात काहूरी दिवे

तु तुझ्या दिशेची सावर

झाडांची निजली छाया

पानावर उजळून येईल 

चंद्रव्याकूळी माया 

मी कुशी तुझी का शोधू

थव्यास उसंत देण्या

की बहरून उगवून येवू

सडा फुलांचा होण्या?

अवरुध्द घटिका स्तब्ध 

कंठ तुझा का दाटे?

अव्यक्त प्रारब्ध आपले

व्याकुळते स्वप्नावाटे

चांद नभाला शिवतो

निशीगंध तयात भिनतो

अवकाशाच्या मलमलीची

मी नित्य कविता विणतो

या तलम गोजी-या हाका

दुर दिशात विरती

ही किती युगाची भिरभिर 

थवे व्याकुळी फिरती......

मिळू दे उसंत थव्याला

घे ना हाक उराशी!

शांत मंद होईल 

हुरहूर मग जराशी!

                         ("やraτa ₱)                           

www.prataprachana.blogspot.com

 २६. ११.२०२३ 

धिर व्हावा

घनश्यामा ये तु तत्पर !

राधा झुरते आहे

कळ तुझ्या बासरीची

अंतरात स्फुरते आहे

भेट अशी ती व्हावी

अनंत कवेस यावा

उगवल्या चंद्रास नभी 

फुटो चांदणधावा

एकात्म सारे व्हावे

विलग उरो ना काही

विरुन एक व्हाव्या

बहूमुखी दिशा दाही 

स्वत्व तुझे व्हावे

एक सुर व्हावा

तो पावेतो तगण्याचा

मला धिर व्हावा!

                            ("やraτa প")                           

www.prataprachana.blogspot.com

१८. ११.२०२३ 

 

 

साजन खुणा

ढग चालले चालले

न्ह्याळत साजन खुणा

आणी स्पर्शिती डोंगर

आठवणींचा जुना 

दिसतो एक पारवा

शोधत अजाण खोपा

युगायुगाच्या अंतराने

त्याच्या काळीजखेपा

दुर सजनी एकली

क्लांत आठववेळी

बट एक स्थिरावे

तिच्या उन्नत भाळी

हात उगाच काहूरे

चेह-याचा अधिर भास

या सांजेस गुलाबी छटा

भवती तुझा सुवास....

                          ("やraτa প")                           

www.prataprachana.blogspot.com

 १५. ११.२०२३ 

दरवेशी

या साजनवाटा भिनती

जणू धुक्याला रंग

मी सांजनयनी पाहे

तमाचे काजळी अंग

तु सांडुन जाते सारे 

माझ्या ओंजळी तारे

मी रातगतीचे चांदणे

रेखतो तगमगणारे

तू देत नाहीस हात

माझ्या रित्या हाती

मलूल एकट विझती

हृदयाच्या हळव्या वाती

दे ना चेत मनाला

अंधार जाचला असता

मी व्यापून असे काय घेवू?

तुच तु साचला असता

दे अखंड असे चैत

या हेमंती क्षणांना

तु दे अंतराळ अनंत

एकेका प्रेम कणांना

व्यापू दे अंतर्बाह्य 

ये असे एकदा कवेशी !

शब्दांचे नगर वसवेल

हा विरहांकित दरवेशी...

                           ("やraτa প")                           

www.prataprachana.blogspot.com

   ९. ११.२०२३ 

 

 

प्रेमझरे

दुवे कुणाचे वसले

आत्म्याच्या भावतळी

हुरहुरते भिरभिरते

माळावरती एक कळी

झुरझुर वाहते एकले

हेमंताचे व्याकुळ वारे

सोनफुलाचे काळीज

अव्यक्त हुरहुरणारे

फकीर कुठली गीते

झोळीत सावडून घेतो

एकांत जुलमी सखा

स्मिताने आवडून घेतो

गातो तीव्र निःशब्द 

तो शब्द आरास रचतो

कुण्या दुरदेसीच्या सजनीला

तो अनाहूत सुचतो

तो असतो आभास धुसर

तो नसतो वास्तव खरे

तरीही त्याच्या चाहुलीने 

तुझ्या अनंतास प्रेमझरे.... 

                           ("やraτa প")                           

www.prataprachana.blogspot.com

  ८. ११.२०२३ 

गडदतो

खुणवे शरद चांदणे 

लागे थंडीची चाहूल

माझ्या कवितेच्या वाटे

सखे तुझे रुतले पाऊल

चंद्र दुधात सांडतो

तुझ्या तनाची आभा

मी टांगतो आस तुझ्या

उत्सावल्या नभा

छबी तुझ्या मिरेची

कृष्णछायेची सावली

वाहे माझा धावा

वृंदावनाच्या पावली

या राती असा कसा

विखरे चांदण्याचा तिर ?

माझ्या नदीचाही अनावर

सुटे वळणाचा धिर

सारे दुधाळले भवताल

त्याला शामरंगी कांती

घे शब्दाची विराणी 

दे हृदयास या शांती

वाहतो आहे मी निरंतर

कितीक युगे सरती

तुझा आभास गडदतो

आणी उंच चंद्रा वरती

               ("やraτa প")                           

www.prataprachana.blogspot.com

                      २८. १०.२०२३ 

 

 

  

डंख

काळजातले देणे माझे

तुला कधी ना कळून येते

फुल एकले फांदिवरचे

मंद हवेने छळून जाते

गंध असा हा दरवळ दरवळ

झुळुक अशी ही भान हरवे

तुझ्या दिशेचा रिता कोपरा

मनास माझ्या कशास झुरवे?

फांदी हिरवी दवात न्हाते

गवतफुलांचे अंग कोवळे

नभात माझ्या उधळून येती

स्वप्न तुझे बघ सोनसावळे

तरीही जाचे तुझे रितेपण

हिमनगाची निर्जन टोके

पानगळीचा ऋतू जणू हा

वाटत राहते ओकेबोके

चांद मलूल का होतो येथे ?

उगवत असता सकाळ ताजी

हो ना तुही मजसम व्याकुळ 

आणी माझ्या कुशीस राजी

धुंद होऊ दे जगणे सारे

हाकेस माझ्या पंख मिळू दे

किती जहरी तुझा दुरावा

डंख त्याचा तुला कळू दे

                          ("やraτa প")                           

www.prataprachana.blogspot.com

२७. १०.२०२३ 

 

अदृश्य हाक....

अंधार असा का जळतो

धुप जणू दरवळते

अदृश्य हाक कुणाची

का मनी कळवळते?

करुणेचा जोग मनाला

झाडात उदासी फिरे

लुकलुकणारे दिवे सांगती

दूर निजली घरे

त्या उंच शिखरावरती

वावरे एकला जोगी

निरव तमाच्या साक्षिने

निद्रा आपली त्यागी

चंद्र ढगाशी निजतो

निद्रेत चांदणी हसते

धुक्यात विरले जंगल

अंधार कुशिला बसते

दुर पिराच्या पायरी

फकीर दुवा पढतो

त्या लयीवर स्पंद

अंतरात धडधडतो

असे स्तब्ध सारे

आस एकली जागी

फकीर पढतो दुवा

ध्यान लावतो जोगी.... 

                         ("やraτa প")                           

www.prataprachana.blogspot.com

 २६. १०.२०२३ 

 

युगंधर....

तु आलास युगंधर असा

घडवत युग नवे!

तु साकारलीस मानवता

धम्मचक्रा सवे !

   धम्मचक्र प्रवर्तन दिनाच्या हार्दिक शुभेच्छा!

                 ("やraτa প")                           

www.prataprachana.blogspot.com

                      २४. १०.२०२३ 

 

 

नतमस्तक.....

चक्र तुझे अमुल्य

अंधार संपवत चाले!

मदधुंद रुढीचे गज ही

नतमस्तक तुला झाले!!

धम्मचक्र प्रवर्तन दिनाच्या हार्दिक शुभेच्छा!

                 ("やraτa প")                           

www.prataprachana.blogspot.com

                 २४. १०.२०२३ 

 

 

रूजवा.....

कोंब फुटले झाडाला

आली त्याला हाक

त्याचा अंतराला येते

कोण्या आपुल्याची झाक 

झाडा येती वेणा

जणू गौतम चालला

त्याच्या काळजाशी

जणू बुध्द बोलला

कसले हे रंग

त्याच्या रूधिरा रंगती

त्याच्या कोमलाला लाभे

आत्मगंधाची संगती 

खुलते वाटिका

हसे रान सारे

मधूमक्षिकेच्या साठी

राखलेले मधू चारे 

कोण्या आम्रपालीचे

रुप त्यास छान येई

तुझ्या चक्षूने का फुल

सन्यासी भगवे होई 

मी लावलेले ध्यान

जणू समाधी गाठते

अंतराच्या आत खोल

झाड रुजले वाटते..... 

           

             ("やraτa প")                           

www.prataprachana.blogspot.com

                 २४. १०.२०२३ 

 

 

भूलकर

तु मुझे क्यूँ , यूं बार बार 

मेरी याद दिलाता है?

मै खुश हूं तेरी तलाश मे

खुद को भूलकर ।

             ("やraτa প")                           

www.prataprachana.blogspot.com

                 २३. १०.२०२३ 

अज्ञाताच्या वाटे

गीत अनावर साचे

हृदयाच्या खोलदरी

लाट तयाची अवरुध्द

येई नयन तिरी

या भिजक्या पाऊलवाटा

चांद नदीत बुडतो  

निश्चल पाषाणाचा

शिलालेख बघ घडतो

लिपीस वळणे देते

तुझ्या नदीचे पाणी

मी निर्मित जातो अक्षय

ओली हिरवी गाणी

ताटवा आभासी खुलतो

तव गंध तयाला भेटे

हा गंध आभासी नेतो

अज्ञाताच्या वाटे.....

                   ("やraτa প")                           

www.prataprachana.blogspot.com

                 २१. १०.२०२३ 

 

शांती गीत

माझे क्रुसाळले हात

शब्दांचे बोट धरून 

लिहिताहेत शांती गीत

कवितेचे अंतःकरण ही

विसरते आहे त्यायोगे

कधी होते ते भयभीत 

         ("やraτa প")                           

www.prataprachana.blogspot.com

                 १७.१०.२०२३ 

उम्मीद का फुल

नख्ले याद को मै
काट कर फेंकना चाहता हूँ
मगर कमबख्त उम्मीद का फुल
तभी शाख पर मुस्कुराता है।

(*नख्ल=वृक्ष)

       ("やraτa প")                          
www.prataprachana.blogspot.com
                 १९. १०.२०२३

दुवा-ए-खैर

असरदार है तेरी

दुवा-ए-खैर

मै जो जी रहा हूँ 

तेरे बगैर ।

            ("やraτa প")                           

www.prataprachana.blogspot.com

                 १९. १०.२०२३ 

 

कान्हाहृदयी.....

चल अनावर होऊ

तळ हाकेचा गाठू

कान्हाहृदयी राधेचा

हुंदका बनून दाटू.....

              ("やraτa প")                           

www.prataprachana.blogspot.com

                 १२.१०.२०२३ 

हाक अनावर संथ

तीव्र हाकांशी माझ्या

करूनी मौन सुले

नदीस तुझ्या मी माझी

दिली रंगीत गंधीत फुले

अत्तर होवुन वाहील

हाक अनावर संथ

सुवास या प्रितीचा

भारेल तव दिगंत....

                          ("やraτa প")                           

www.prataprachana.blogspot.com

  १२.१०.२०२३ 

तु....

तु गेली तेंव्हा ....

ईकडे बहर सांडला होता

मिलनाचा रंग गुलाबी

मी शब्दात मांडला होता

त्या गर्दगुलाबी शब्दांनी

मी कविता रचत आहे

आणीक माझ्या अंतरा

फक्त.. तु...सुचत आहे

                ("やraτa প")                           

www.prataprachana.blogspot.com

                 १.१०.२०२३ 

स्पंदबाव-या हाका

एकांत आतला पेटतो 

ऊन हळू निवताना 

मी मोहरुन रंगीतगर्द

भास तुझे शिवताना 

ओलांडून किरणे ढग हा

निघे निशेच्या गावा

राधेच्या काळीजहरिणी

निघती शोधित पावा

हतबल होते हुरहुर 

डोहात उजळते पाणी

काळीज व्याकुळ होते

हृदयात उमलता गाणी  

रंग सांडून रवी निघतो

धरतीच्या ओटीपोटी

सांज क्षणाची होते

काळजा एवढी मोठी

कल तुझ्या येण्याचे

पायरव का अडतो? 

आवाज तुझा गं सखे!

हृदयात बघ धडधडतो 

या स्पंदबाव-या हाकांचे

उत्सव सांज समया

एकांत मिठीला माझ्या

आठवांची तुझ्या किमया!

                             ("やraτa প")                           

www.prataprachana.blogspot.com

     १.१०.२०२३ 

आसमानी हुरहूर

सखे! बहर अनोखे भाव

पाखरे असे का फिरती?

भास तुझे आसमानी

भवताली भिरभिरती

मी काय शोधत फिरतो?

मलाच नसते ठावे

का मजला हुरूपून देती

तुझ्या गावचे रावे ?

आणती कसले संदर्भ ?

अंधुक गतकाळाचे

काळीज हुरहूर करते

मजसंग या माळाचे.....

                         ("やraτa প")                           

www.prataprachana.blogspot.com

   २८.९.२०२३ 

आठवांचे कुळ

या सुर्यमुखी हाकांना

गुलमोहरी फुलांचे तुरे

का अखंड वाहती मनी

तुझे आभासी झरे?

समाधिस्थ मुळांचे झाड

त्यास बहर केशरवर्णी

फांद्या फुलास त्याच्या

अज्ञात पाखर झुरणी

सडे फुलांचे अवनी

केशर माती झोपले

मावळतीचे रंग बिलोरी

संध्या मिठीत लोपले

घनगर्द आतुर वेळी

तु वाट कुणाची पाहे?

वाणीस त्या आभासाने

फुटती व्याकुळ दोहे

त्या दोह्याची शब्दे

झाडाचे मुळ होते

मन माझे घनव्याकुळ 

आठवांचे कुळ होते

                              ("やraτa প")                           

www.prataprachana.blogspot.com

    १९.९.२०२३ 

एकांतास सद्गती

निळ्या नभाच्या खाली

मिटून आपले डोळे

शुभ्र धुक्यावर उमलून येती

आभासरंगी सोहळे

एक ढग तो बहुरंगी

जणू जळाची धारा

व्यापून स्पर्श करतो

सुक्ष्म थरथरणारा

जोग घेतली झाडे

त्यांना जांभळी झाक

वारा टिपून आणतो

एक मुकी का हाक

मी चंद्र पेरा करतो

माळाचे काळीज हालते

कोण सखे गं तुजला

घनव्याकुळ मुक बोलते

पाणवठ्यावर होती

आभासाशी डोळाभेटी

काळोख उधळून भरतो

चांदण्याने तुझी ओटी

दे चांदण्याचे हात

या आभाळगोंदी हाती

उजवून देईल वारा

एकांतास सद्गती! 

             ("やraτa প")                           

www.prataprachana.blogspot.com

                 १७.९.२०२३ 

  

 

बकुळ फुलांची राई

बकुळफुलांच्या राईचे

कसले हे गवगवे

झाडांच्या फांदिवरती

साजन गंधी थवे

स्मरणात का खुलते

बंद कळ्यांची फांदी

एकांताच्या झुळकीला

सहवासाची नांदी

हे झाड किती युगाचे

हर बहरी व्याकुळ झिजले

त्याच्या मुळतळाशी

कितीक स्वप्ने निजले

तु भाव सुरंगी छेडता

स्वप्नांचा बकुळ होतो

साजन दुर देशीचा 

घनघोर व्याकुळ होतो

           ("やraτa প")                           

www.prataprachana.blogspot.com

                 १७.९.२०२३ 

नाव

शब्द तुझे 

की भाव?

कवितेस कोणाचे

देवू मी नाव?

("やraτa প")                           

www.prataprachana.blogspot.com

                 १७.९.२०२३ 

धिराने

आघात गहिरे तरीही

खोडांना फुटती पाने

झाड विसरते घाव

हिरव्या कंच धीराने....

                      

              ("やraτa প")                           

www.prataprachana.blogspot.com

                 १७.९.२०२३